Fasnacht 2010

Giftnuudle 

dr Beat Schlatter het im Fäärnsee gsait s isch Faggt

ass uns das Grippeseili-Lueder alli paggt

mer freye is uff s näggschti Dierli, s kunnt jo glyy

es griesst eych s Bundesamt fir Gsundhait und Kemyy

 

ha ghofft me kunnt sich in dr Gryyse wider neecher

doch dr Mensch will s immer schnäller, immer heecher

s goot au bim Roche Turm oder bi de Minarett

jo schliesslig immer drum wär dr Lengschti het

 

“du hesch doch Schiss” sait mini Frau bim Moorgekaffi

“sunscht hättsch doch sicher au e Värsli vom Gaddafi”

“du I ha e bombe Värs mi liebe Schatz,

numme het jetzt laider d Pointe nimme Blatz”

 

ganz ooni Booni mien miir Bänggler Fasnacht mache

unsri Booni sinn dr Byyfall und au s Lache

und wenn s halt denne mit de Värsli nid so haut

no saag i eifach es het mer aine d Daate klaut

 

im Yyloche isch dr Tiger Woods dr Bescht

das stellt me neierdings nit nuur im Golfe fescht

wie dr „Becker“ liebt au äär dr schnälli Fun

im Golfe sait me däm das isch e „Hole in one“

 

dss neye Boschtchef ha mi voorstelle welle

i syygi laider bizzli z spoot dien si verzelle

aber nämme si doch Blatz mer gänn is mie

dien si wie alli andre au e Nummere zie

 

Das „Wetten dass“ isch nur no pyynlig, s duet scho wee

dää schlipfrig alti Maa kan i aifach nimme gsee

froog mi wie lang me no die Sändig duureschlebbt

wenn d Michel Hunziker efang scho s Nyywoo hebbt

 

I ha e waansinns Abfallbäärg gsee uff dr Strooss

kabutti Stiel und soo, ha dänggt was isch doo loos

„isch hütte Sperrguet“ han i aine gfroggt per see

nanaai, e gweenligs Haimspyyl nur vom FCB

 

Bim Muusikante-Stadl maine d Chefstrateege

ass me yyne vyyl zvyyl Stai in Wääg wurd leege

jetzt kunnt die Alpeschunggel-Bandi nimm doo aane

mer hättes sälber au nid besser kenne plaane

 

Dr Merz und Moritz mache ab und zue so Sache

ass de wirgglig dänggsch jä sinn die nid ganz bache

ganz anderscht dr neyi Bundesroot dää find i guet

i waiss zwoor nooni wie n er haisst und was er duet

 

dr FC Ziri isch dr allerschlächtschti Maischter

das heert me iiberaal nid nur vo beese Gaischter

i ha s scho immer gsait, jetzt stoots au in de Bricht

s isch schyynts im Dach bi deene ebbis nid ganz dicht

 

Vor Auge haan i no die Bilder vo sim Gsicht

vom Berlusconi, dä arm entstellti Wicht

mi erscht Gedangge isch dert gsii, i find das stargg

jetzt hänn si z Mailand unde au e Bäärepargg

 

Vyyli wo gange sinn wänn wider e Aafang wooge

au dr Schummel-Schuumi het s wider ins Auti zooge

bizz ängschtlig hoff i und nimm e groosse Schlugg

s kunnt dr Michael Jackson nid au no wider zrugg