D Fuessball Natzi isch z Malta daucht

mer hänn is gfroggt, was hänn die graucht

nach Garmisch und Oslo froggsch denn gly

fahre die glyche au no Schy

 

S Wätter spinnt, luegs numme a

alles wäg däm Kachelmaa

hett er e Hoch in de Hose gha

isch er in dieffere Laage dra

 

Bim Neat-Durchstich sait e Maa

Sedrun isch doch grad obedraa

und dert obe griegsch, das waisch

s beriehmte Bü-Bü-Bündnerfleisch

 

Ich erlaub, sait dr Pabscht in Rom

ussnahmswiis sogar Kondom

ganz in schwarz mit Weihrauchgschmagg

und jede Priester griegt e Pagg

 

D Anschi Merkel die isch gschoggt

Ihre Guttenberg dä hets verboggt

au ihre Coiffeure bschysst unerheert

dä hett schynts nur Bässemacher gleert

 

Am Färnseh do kasch immer meh

uff alle Kanäl Hellseher gseh

doch lyttsch denn aim vo däne a

froggt die Pfyffe, wär isch dra

 

Scusa, al telefono

e Berlusconi Silvio

warum ich rufe Svizzera

möchte Sennentuntschi ha

 

S Frauestimmrächt fyyrt 40 Johr

mir zwai fyyre 30 Johr

und aine, das isch laider wohr

fyyrlet z Riehe s ganze Joor

 

D Aisha drait mit Stolz e Burka

und wanderet dermit uff d Furka

wird d Burka verbote, muess sie morn

dass es wieder raimt uff s Matterhorn

 

Unsri Larve die hett hitte

an de Schnäbel ziemlig glitte

mer hänn duss uss Spass, oh je

gsait mer sinn vo dr SVP

 

S Volgg hett entschiede, findets guet

dass s Gwehr dehai verroschte duet

e Waffe dehai, s blybt bim alte

und dr Fährimaa darf s Bierglas bhalte

 

Vor de Wahle hänn mer s guet

wenn e Bolitigger schnuure duet

kunnt is in Sinn, so bim verzelle

mer mien no dr Abfall uuse stelle

 

Hesch e iphone bisch derby

s git gly e app vom Morin Guy

d Rede druff kenne nitzlig sy

mit däm schlooft s zahnend Buschi y

 

Dr Schang vo Ziefe stoot im Stall

Theatergäld gits uff kai Fall

d Kultur bi öis isch denne guet

wenn dr Mischthuffe dampfe duet

 

Dass d Armee nit funggtioniere ka

mit nur no achtzigdausig Ma

lychtet y, die bruchts elai

bim Harasselauf in Münchestai

 

        Me waiss nit was in 100 Joor so goot

        ob in Ziri denn e ney Stadion stoot

        sicher isch nur, dass denn dr F C Z

        100 Joot gege Basel verlore hett