25
Joor:25
Joor:
Dr Uffgweggt 2011
Wenn konsequänt e Presidänt d Lytt unterdruggt
wird s Volgg gschunde, uff die unde numme gspuggt
denn muesch, grad z Egypte, wisse, dasch kai Witz
wenn s d Pyramide keert, wird’s hart für dä am Spitz
D Mumie z Egypte sind alli stumm wie ne Fisch
Scho no schad, dass dr Mike Shiva kei Mumie isch
Isch das di Splyyn, kasch wyterhyyn, ych finds zwar krank
Näb dr Reizwösch au no ei – zweiGweehr im Schrangg
Punggto Waffebsitz blyybt leider alls bim alte
Und drum darf dr Fäärima si Bierglas bhalte
Dä Morgestärn, mit de Stachle dra
Ghört em Kachelmaa
Es maint e Goof: Ych find das doof, s geen die Plakette
S isch allerhand, nit inenand, wie si doch sette
No schlächter passt, sait är, do gseesch, är isch kei Lappi
Nur no dr Elton John in d Rolle vom ne Papi
Mei gäbt das e Super-Mischig vo Bambini
Zwische Elton John und Gianna Nannini
Es het dä Gnom vo Rom s Kondom jetzt doch erlaubt
Nur leider loot är das erscht z spoot zue, het ein gschnaubt
Hätt me s vor achzg Johr scho mit Gummi gmacht, statt ohni
No gäbts villicht jetzt gar kei Silvio Berlusconi
Für jungi Chicks stöhn d Türe immer off
Im Silvio sim Bunga-Bunga-low
Mir isch doch, brummlet dr Koch, dr Kardinal
Die dummi Gummi-Froog im Grund gno ganz egal
S isch für uns Prieschter die Froog wirklich nit brisant.
Oder kenne sie e schwangre Ministrant?
E glaine Binggis froggt sy Bappe intressiert:
Bin ych katholisch oder bin ych informiert?
Z vill Liecht, das macht, dass in dr Nacht d Tier nimme pfuuse
fühle sich gstört, au no bim flörte und bim schmuuse
Mir Basler wänn nit, dass grälls Liecht die Tierli quält
und hän als Preesi drum nit grad dr Hellschti gwählt
S dieg sich im Rothuus, gheert me beesi
Stimme munggle
wenn gwissi kemme, grad dr Sitzigssaal verdunggle
Dä Fluglärm steert rieft ganz empeert z Allschwil e Ma
Kuum gits bitz Wind fliegt me scho gschwind uss Süde a
Ich finds no cross-air, macht e Lingge ei Gekrächz
Dass d BaZ trotz Sutt-air so vill Aflüg het vo rächts
Sit deert e Blocher-ChromoSomm si Sicht verkauft
Han ych d BaZ in Albisgüetli-Poscht umtauft
Im Gotthard-Loch isch me jetzt doch scho durebroche
Dr Moritz L rieft an där Stell ganz knochetroche:
„Dasch uff dr Wält, glaub ich, die allergröschti Reere!“
Das glaubsch au nur, bis s neggscht Moll muesch dr Blocher gheere
Nach e paar Sekunde schrille Blocher-Döön
Findsch Vuvuzuela-Getröte richtig schön
Dr Blatter Sepp, de rieft voll Pepp und voller Muet
„Z Katar, die Hitz, die steert kai bitz, me kickt glych guet!
Und grad mir Schwyzer wärde schampar profitiere
Will mir scho lang jo mit me Hitz-Fäld trainiere.
Und s allerwichtigschte, betont dä FIFA-Bolle
Isch nit dass d Bäll, sondern dass d Rubel rolle
„E Terror-Aggt!“ het eine klagt, „Wie ne Rakete
isch s uffe gflitzt, s het sogar blitz!“ duet är prolete.
Doch d Polizey, die dämpft das Gschrey und maint gelasse:
„S wird nur e Prämie gsi si von re Krankekasse!“
Wotsch dini Krankekasseprämie useschloo
Muesch däglich siebzäh moll zum Doggter go
S bringt
mi Kolleg als si Verpflegig in so Boxe
vo Tupperware, doch kuum ischs leer, dasch s paradoxe
klagt är beraits: emoll in d Baiz das schetzti sehr
ach, wenn mi Lohn doch au emoll---töpper wer
Für e Bänkerlohn wär e Tupperwer die falschi Hülle
Scho nur si Bonus wurd e ganze Spyyssaal fülle
Bim FCZ im Stadion hett e Fux si Bau
und zwar, s isch heiss, Im Aspielkreis, z mittst drinn genau
Me knallt en ab, do isch in Ziri, gheert me unke,
uff dr Stell dr Durchschnitts-IQ drastisch gsunke
Me het de Fuchs denn ussgstopft ins Museum trait
E schlaue Zircher isch halt scho ne Sälteheit
S isch gspunne weisch, e Kleid uss Fleisch treit d Lady Gaga
Luegt me das a, kehrts mängem Ma fascht grad dr Maga
Doch ein luegt d Foti a und lacht mit eim Gekreisch
Es isch dr Merz, wo wieder meint, s sig Bündnerfleisch
Dass sich das Fleischkleid duresetzt, wett ych nit wette
S wäsche giengt jo ----- aber s glette!
E Schönebuecher Rammel git nit gärn Gäld an Rhy
Är sait zwar: Mir wei luege! Doch zahle muess nit si
Drum definiert me jetze: S isch eBaselbieter Ma
Ein wo nur profitiert vo däm, wo Basel biete ka
