Die Groobschlächtige
syt 1843
Bebbi Bängg – Fasnacht 2011
So alti Schruube, wie d Gianna Nannini
wänn hütt zu Daags unbedingt no Bambini
Mir hänn ghöört, dass d Chance gaar nit so schlächt syyg
Au im biblischen Alter vo 50 bis 60
Aber wyter oobe uff em Befruchtigsindikatoor
bruuchsch dr Buschiwaage nur als Rollaatoor
Letscht Mooned in dr MUBA Halle
wird ich bim Gaschtland überfalle
D Egypter gämmer Ranzeschnitte
Derbyy saag ich no fründlig “Bitte:
Y hätt so gäärn e MUBA Sagg”
Und verstande hänn die Mubarak
Dr Cirkus Knie ka s nit verstoo
Es rennt en Elifant dervoo
D Faandig isch präzyys und gnau:
'Groosse Rüssel, alt und grau'
Gänd Acht, sait do dr Franco Knie
und fanget nit dr Morin Guy
Daas isch e Bunga Bunga Lyysi
No keini18 – drumm daarf sy derbyy syy
Dr Silvio B. hett d Hoose dunde
Wie immer duurts nur 10 Sekunde
“Isch'e gäärn gschee”, seit dr Berlusconi
“Aber wääle daarfsch'e my leider nooni”
Hänn Iir gläääse im Buech vom Heilige Babbe?
Jetzt erlaubt dä blötzlig d Gummikappe
In üsserscht bränzlige Nootsituatioone
und zur Unfallbekämpfig wurde die sich loone
Dä Entscheid isch absolut histoorisch
und für Bischöff und Brieschter obligatoorisch
Mir zwei sinn dubioosi Freaks
und lääse drumm gäärn Wikileaks
Näbscht Haafekääs und Pyynligkeite
findsch unzensierti Halbwoorheite
vyyl Traatsch und Klatsch…kuurz in eim Satz
De spaarsch das vyyle Gäld für d BaZ
Die Blaggedde do findet my Alti romantisch
wel das Puzzle schyyns mit dr Liebi verwandt isch
Denn für jeede Maa uff däären Äärde
gääbs die bassend Frau zem glügglig wäärde
Nur: nimmt ein vo Euch die Falsch in dr Dümmi
stimmts brompt für alli andere nümmi
Wo s en uffbaart hänn im Köllner Doom
defiliert e groosse Menschestroom
am Kraake Paul sym Säärgli duure
Do foot dr Kardinaal aa schnuure:
"Dr Paul isch nümm in unsrer Mitti…
So, und jetzt gits Calamari fritti !!!“
Dä zu Guttebäärg hett Drägg am Khittel
Hett bschisse bi sym Doggterthittel
In Dütschland seit me dämm "Blagööri"
"Groosskotz" und au e "Riiseschnööri"
Daas döönt für uns fascht wien e Loob
für e ganz normaale Durchschnitts-Schwoob
Ammigs weiss y nit, was sich my Alti dänggt
Sy hett mer son e neumoodischs Händy gschänggt
Eins mit allne Schykaane...und s Beschte draa
syg die Mega Pixel Kameraa
Dä Saich bruuch y nit, daas hann y mer gschwoore
Was söll y mit Bilder vo myne Oore?
Skandaal um Jöörgli
Gsunge zer Melodyy "Skandal im Sperrbezirk" vo dr Spaider Mörphy Gäng
Im Färnsee gits e Kachelmaa
Dä hett e spitze Stachel draa
Zerscht juggts en voller Ungeduld
Denn git är syne Gumsle d Schuld
Wenn Du als Frau dy knätte losch
vo dämm perväärse Wätterfrosch
denn kasch druff go, e jeedi Wett
dass är au no 10 andri hett
Und Zooben in dr Tagesschau
heissts dr Kachelmaa hett Soomestau
Skandaal (Skandaal) um Kachelmaa
Skandaal (Skandaal) um Kachelmaa
Skandaaaaaaaal
Skandaal um Jöörgli
Sy Hirni isch so brogrammiert
dass är uff jeedi Zwätschge stiert
Ob mit 32-16-8
Är hett mit allne umme gmacht
Drumm Fraue, Maitli looset zue
und kaufet lieber Jogging Schue
Denn wäär nit rasch gnueg seggle ka
Dä paggt dr Unggle Kachelmaa
Nääb dämm isch doch dr Bucheli
son e ganz e braavs Eunucheli
Skandaal (Skandaal) um Kachelmaa
Skandaal (Skandaal) um Kachelmaa
Skandaaaaaaaal
Skandaal um Jöörgli
